【本報訊】南美雙雄輸死人！雖然巴西同埋阿根廷喺友賽分途出擊都不敗，但亦都贏唔到對手，當中以擁有美斯嘅阿根廷悶和沙特阿拉伯0:0最過份，而巴西喺國家隊史第1000場比賽只能夠同哥倫比亞1:1言和，有份入波但亦射失12碼嘅尼馬就成為焦點。
巴西同哥倫比亞喺美國新澤西巨人球場較量，上半場尾段古亞達度幫哥軍領先1:0，但森巴兵團喺換邊後憑尼馬入波追和，本來呢位山度士球星可以化身做完美英雄，可惜佢完場前主射12碼宴客，球迷真係唔知讚佢定鬧佢好，亦唔識界定佢係英雄定罪人，畢竟今仗係巴西隊史第1,000場比賽。
尼馬個人就非常之自責，佢話明白今戰係歷史性時刻，但就歸咎草地不平所以先會失手，仲強調當時已經好細力，但個波都「打飛機」。尼馬話諗番起射失嗰一刻仍然瞓唔著，不過自己係巴西首席劊子手，唔會因為咁而逃避再射12碼。
巴西和哥倫比亞1:1未算衰，阿根廷同沙特阿拉伯踢成0:0仲嚇死人，雖則話要山長水遠作客中東啫，但球隊有美斯、迪馬利亞同馬斯真蘭奴等巨星，都冇理由贏唔到啩？除非美斯對住恩師列卡特手軟啫，後者都應該估唔到可以帶領沙特和波。齊齊燒鬚嘅巴西同阿根廷下周會喺小保加糖果盒球場友賽，唔知到時又會點呃大家錢呢？