加拿大小天王Justin Bieber負面新聞真係無日無之，而且仲係鑊鑊新鮮鑊鑊甘，繼早前被指喺巴西步出妓院斷正外，又爆出喺巴西開P時，被偷拍疑似喺床上短片，成為熱話；唔單止咁，上月小Justin喺阿根廷開騷期間，佢同保鑣團隊涉嫌與當地攝影記者發生衝突。
日前記者更加告上法庭，指控小Justin及保鑣團隊多條罪行，包括多次盜竊、詐騙、傷人及非法闖入。記者嘅律師表示，當時記者喺保齡球場外等候小Justin，不過小Justin竟命令保鑣搶去記者相機，又指使保鑣闖記者嘅辦公室搗亂及搶錢，據悉當局日前已向小Justin下通緝令。